MI RICORDU E ’ON MI SCORDU
(Mimmo Badolato)
Mi ricordu tempu arretu,
Quand’on jia a lavorara,
Eru conzatu comu a San Petru,
Cca varva longa para para.
Mi ricordu i scarpi rutti,
I cammisi arrepezzati,
Ogne tantu a panza chjna ,
E pumadori assulicchiati.
Mi ricordu e non mi scordu,
Ch’eru orfanu e malatu,
Puru u Sindacu ’u sapìa,
Ch’eru puru disperatu.
Mi ricordu i fhjuri beddhi,
L'acqua d’o mara chiara, chiara,
I vichj stritti, stritti, stritti;
Cchi on potivi caminara.
Mi ricordu e non mi scordu,
E na perzuna tantu cara,
Iddha sì comu na mamma
T accugghìa senza parrara.
E quando ncuna vota
Eu ppe casu cci passava,
A casa tutta iddha aprìa
Perzinu a tavula e mangia.
Ma on è ca vogghiu dira,
Ca iddha è tuttu bonu stara,
Puru iddha tira a vita,
Puru iddha tira a campara.
Mi ricordu e non mi scordu
E cu’ fa bbena e non fa mala,
Cutureri anticu, vecchju, bbonu,
Iddhu tampra u misala.
Taccumpagna i canzuni,
Ccu catarra e mandulinu,
Ccu l’attiosi on va d’accordu,
Ma va bbonu ccu ’u vinu;
Sona bbonu sona cuntentu
Oramai sta vita ava e passara,
A gugghja l’usa comu strumentu,
Ma tira avanti ma po campara.
Mi ricordu e on mi scordu ,
Quando bussau a la portu mia,
Nu guagliona cc’u patra ,
Ma cci sonu l’Ave Maria;
Iddhu è picculu ma è tantu randa,
Iddhu no sapa, iddhu on ci arriva,
Iddhu mi deza a forza ma campu ,
Iddhu mi deza a forza cchju viva:
Jia e venìa quandu era malatu,
Cchi piatti ,ccu mangiara conzatu.
No ficia nessunu de parenti cari,
M’o ficia u guagliona ccu cora all’ otari.
Mi ricordu e on mi scordu,
D’e panni ambrati da casa mia,
D’e rosi russi supra u barcuna,
D’o maccatura jiancu da mamma mia.
Inviata da Anonimo il 12/04/2006